الأحد، 23 أغسطس 2015

احزان سنة فاتت "الجزء الثالث"


هذه الكلمات كتبتها اعتبارا من تواريخها
ومازلت مقتنعة بيها برغم مرور الزمن وضياع الاحلام  
************************************************

3/4/2012
فى مقالة فى المساء امبارح شوفتها بالصدفة..بعض الاخوان يقولون ان خيرت الشاطر هو اردوغان مصر ...
احب اقولهم ان اردوغان طول عمره بيشتغل فى السياسة من اول رئاسة بلديات اسطنبول المختلفة الى رئاسة بلدية اسطنبول الكبرى وصولا الى رئيس دولة تركيا..

انما المهندس خيرت الشاطر احب اساله من انت ؟؟غير رجل الاعمال والمحبوس على ذمة قضايا غسيل الاموال ؟؟؟
  
5/4/2012
محدش يقول ليه الناس كلها بتترشح للرئاسة ..ليه الناس كلها منافقة واللى كان بيبوس رجل مبارك الشمال دلوقتى بيبوس رجل الثورة اليمين ...السبب بسيط وواضح ..
لو كان مبارك اتحاكم محاكمة عسكرية او حتى محاكمته كانت اسرع واخد عقابه ودخلوه مستشفى كان كل عيان فى السجن بيدخلها ...لو كان حق كل واحد مات فى الثورة وبعدها اتجاب واتقطعت اليد الخفية وكل الظباط اتحاسبوا ...لو حق سميرة ابراهيم والبنات اللى اتكشفت عذرتيهم اتجاب ..
كان كل كلب اعد فى حاله وخاف وعرف ان البلد دى فيها قانون حق وليها شعب حقيقى
لان ببساطة "اضرب المربوط يخاف السايب" بس للاسف كلنا اضربنا ولسة هانضرب كمان


18/4/2012
دكتور فوغل كان اشهر دكتور المانى فى فريق الطاغية هتلر ..عذب اليهود كثيرا ..فقررت الموساد ارسال ثلاثة من امهر اعضائها للقبض عليه وارساله الى اسرائيل ..بالفعل تم القبض عليه واثناء نقله الى اسرائيل حدث خطأ ما ولم تتم العملية فاطضروا انهم يأخذوه معهم الى بيتهم ..وبقى قرابة الاربع ايام ثم هرب منهم اثناء مناوبة الفتاة لحراسته بمفردها ..احسوا بالخوف من بلدهم واحسوا بالخوف من فشلهم فقرر اكبرهم ان يقول للعامة انه حاول الهرب ولكن الفتاة استطاعت ان تقتله اثناء هربه ..وبدأ التشجيع لها والتسفيق واستمرت الكذبة اكثر من 30 عاما ولا احد يعلم بانها كذبة غير ثلاثيتهم والدكتور الهارب ...(على فكرة ده فيلم من قصة حقيقية)

انا كنت بحسب ان اليهود الناس الوحيدة اللى بتعرف تكذب وتعيش فى كذبتها ولكن مع الايام اتضح ان هناك اناس كثيرين يكذبون ويعيشون فى الكذبة والغريبة ان الناس كمان عارفين انها كذبة ومش عايزين يصدقوا انها كذلك..

شكرا للشيخ حازم ابو اسماعيل ورانى العجائب فى اسبوع

26/42012
هو الشعب المصرى عنده انفصام فى الشخصية مثلا ...
ولا احنا شعب مش مركز ولا هو ايه العبارة....
اغلبية الناس كانت بتقول لا مش عايزين اسلاميين يحكمونا ..لا للاسلاميين ...ايه هو دكتور عبدالمنعم ابو الفتوح ده مش اخوانى برده متربى على حجر الاخوان وخرج من مدرسة الاخوان قبل اعلان ترشحه او حتى بعد الاعلان... اه هانقول انه اسلامى معتدل ولكنه اسلااااامى...يا جدعان بلاش الكيل بمكيالين...

انا مش ضد انه اخوانى بس ضد ان الناس تقولك احنا ضد الاسلاميين بس مع عبد المنعم ابو الفتوح ...
يا انا تقول انا مش ضد الاسلامين ..يا اما تقول انا مع عبدالمنعم ابو فتوح وتجيبش سيرة الاسلاميين تانى وتحترم كل مرشح اسلامى سواء اخوانى او سلفى او مستقل ..
مع كامل احترامى واعجابى بالدكتور عبد المنعم ابو الفتوح...

ارحمونا بئا :(((

12/5/2012
الفيس بوك اتقلب حرب بين من يؤيد ابو الفتوح ومن يؤيد حمدين
حتى بئا الوضع اللى يقول نعم لحمدين هايكون مع الثورة واللى يقول نعم لعبدالمنعم ابو الفتوح هايروح الجنة
ايه يا جدعان ماكل واحد يحط اللى عايزه بدون التجريح فى اى مرشح

حط آراء لناس بس ماتحاربش المعارضين ليك


13/5/2012
انتخابات الرئاسة ماهى الا عبارة عن مسابقة الدورى العام ..ومع ظهور كل مرشح فى التليفزيون يعتبر ده المباراة بتاعته..وطبعا الجماهير ماتتوصاش ..جمهور حمدين وجمهور ابو الفتوح زى جمهور الاهلى والزمالك بنفس الكم والكيف والشتايم ... تهاجم مرشحى اقطعك..تحترمه اشيلك جوة عينى ..منك لله يا مبارك عيشت الشعب فى عبادة الفرعون وتعظيمه ..لغاية ما هانصنع بايدينا مليون فرعون تانى

17/5/2012
سلسلة بشرية من القاهرة للاسكندرية يعملها الاخوان تأييدا لمحمد مرسى...مش مهم التأييد المهم البشر بئا اللى واقفين كانوا عبارة عن ايه ؟؟
رجال عادى
بنات عادى جدا
امهات واولادهم واقفين فى الشمس
ستات كبيرة

هو الحاج محمد مرسى د مش مرشح للرئاسة يعنى هايكون رئيس لو الاصوات معاه وكسب
يعنى المفروض يفهم هو والمرشد ان هو خدام عند المصريين كلهم بكل انواعهم

اى رئيس هايجى يعد على الكرسى لازم يكون عارف كويس اوى ان هو خدااااااااااااااااااااااااااااااااااااااااااااااااااااااااااااااااام عندنا مش احنا اللى خدامين عند اللى خلفوه
اى كان مين هو مرسى موسى شفيق ابوالفتوح صباحى او حتى البرادعى اللى انا معاه قلبا وقالبا وهو مبتعد عن السباق

ال يقفوا ال عشان خاطر واحد ده هبل اقسم بالله :((((

غلبية الناس بعد الجواز بيفهموا غلط
وده لسبب واحد ان المجتمع فهمه غلط
وحفظهم ان الجواز مسئولية بالنسبة للزوج المسئولية تتمثل فى الشغل عشان الفلوس كل احتياجات البيت موجودة كل المطالبات تكون جاهزة فى الوقت الناسب
والمسئولية للزوجة بتتميل فى ان البيت يبئا نضيف لما جوزها يجى اكله متحضر لبسه نضيف لبس الشغل مكوى وهكذا

والاتنين بينسوا ان فيه مسئولية اهم من كل ده هو اهتمام كل واحد بالتانى فالاتنين بيقع عليهم الغلط مش طرف والغلط ده ماهو الا تعليم مجتمع


24/5/2012
المدرسة اللى انتخبت فيها انهاردة ..كانت فى الوكالة وبالمناسبة مدرستى الابتدائية..الشارع بتاعها كله معلق حمدين..سيبك من المدرسة والشارع..وانا فى اللجنة لاقيت ست ولا بتعرف تقرا ولا بتعرف تكتب بصمت جنب اسمها وراحت للقاضى اللى اللجنة وطلبت منه قالتله هو فين حمدين صباحى هنا ..قالها شوفيه انتى..قالتله انا لا بعرف اكتب ولا اقرا ممكن تعلملى عليه..قالها ادى حمدين وادى العلامة راحت مدققة نظرها كدة فى الصورة وقالتله شكرا واخدت الورقة وطبقتها وحطتها فى الصندوق ... محدش يقول بئا الشعب المصرى مش واعى او واعى.. سيبكوا بئا هى انتخبت مين بس مجرد سؤالها للقاضى وتبص على العلامة اللى القاضى حطها ده بداية مشرقة ان شاء الله لشعب طول عمره مسحول


27/5/2012

سيدى الفاضل عبد المنعم ابو الفتوح..منك لله
الشريف العادل حمدين صباحى اللى هو واحد مننا ....منك لله انت كمان

اولا منك لله يا استاذ عبد المنعم ابو الفتوح لانك قللت من شأن صباحى لدرجة ان مؤييدوك بدأوا يصدقوا قصة انك الاكثر شعبية(وانت من تمثل الثورة منفردا) ولا يجوز التفاوض على الرئيس والنائب..

ثانيا الاستاذ الجليل حمدين صباحى الذى ابهرنى وفاجأنى مفاجأة الزمالك لما يكسب ماتش صعب والكل متوقع فضيحة منه لم تسعى ابدا لتوحيد الصف مع ايا من باقى المرشحين حتى يكون للثورة عنوان جديد ولم تحاول مع ابو الفتوح مرة اخرى


29/5/2012
انا من الصبح مش عايزة اتكلم فى السياسة عشان ماقرفش بس بدجد اللى انا بشوفه ده غريب :((
يعنى ايه ضغط عشان نرجع شخص للسباق ايا كان مين هو يعنى ايه نصدق ان فيه تزوير لمجرد ان شفيق فى الاعادة هو لو ابو الفتوح ولا صباحى كانوا فى الاعادة مكنش هايبئا فيه تزوير .:((

كلنا كنا بنتفرج على الفرز ادام الشاشات سواء ال cbc ولا ال ontv ولا الحياة وغيرهم وغيرهم اللى شاف ان فيه تزوير ما ينطق ويقدم البلاغ ليه استنى لغاية ما النتيجة تطلع نهائى يعنى

لو مقبلناش بنتيجة الانتخابات اى كان فيه ايه معنى كدة ان كل اللى بينادى بحاجة اسمها ديموقراطية يبئا كداب ومنافق لانه مش فاهم معناها

عايزين تنزلوا الانتخابات بتاعة الاعادة انزلوا مش عايزين قاطعوا..
ام الصناديق قالت كلمتها خالص واى انتخابات حتى لو فى كولاالمبور هايبئا فيها تزوير ارحمونا بئا :((

عمو ابو الفتوح والنبى يا اسطى اهدى علينا وماتولعش الدنيا عشان انت وحملتك عارفين كويس انتوا كنتوا بتعملوا ايه فانت بالذات ماتنطقش وتقول تزوير بالمال السياسى ياابو صوت ب 150 جنيه انت :((

مش هاتكلم ومش وهاريح نفوخى
لان الحريق وميدان التحرير بيعملوا دعاية لواحد مالهوش ولا تلاتين لازمة الناس بتقول ياعينى عشان هو كويس حرقوله المقرات بتاعته..

الناس اللى بتكلم عليها الناس الغلبانة اللى ساكنةعندنا اللى مالهمش فى السياسة اصلا
واحدة زى بتاعة اللبن اللى بتقول لواحد ملتحى انتوا فاكرين لما تحرقوا البتاع بتاعه ده هو يكسب ده احسن منكوا على الاقل انه ماردش زيكوا وحرق ليكوا حاجة
والتانى بمنتهى الساذجة يقولها مش هاينجح احنا ممكن نولعها اكتر ماهى ولعة انتى فاكرة الدنيا ايه وهانفضل وراه لغاية مانولعه هو شخصيا

هو الحوار بئا كدة خلاص :(( للاسف عمرنا ما هانعرف يعنى أ ب ديموقراطية


احزان سنة فاتت "الجزء الثانى"




هذه الكلمات كتبتها اعتبارا من تواريخها
ومازلت مقتنعة بيها برغم مرور الزمن وضياع الاحلام  
************************************************


2/2/2012
اى حد يحب يشتم فى اى جمهور سواء الاهلى او المصرى
قبل ما يشتم فى الجمهور
اشتم فى الداخلية اللى تقاعصت عن ابسط واجباتها وهى التصدى للهجوم على جماهير الاهلى
اشتم فى القوات المسلحة اللى اتحركت بعد ما وصل العدد ل73 من الوفيات
اشتم فى المسئول اللى بيستهون بالموقف ويقولك ايه لزمة وجودى فى المكان
اشتم فى ادار اللقاء وهو عارف ان فيه مناوشات بين الجمهور
واشتم فى الناس اللى طالعة تتكلم وتكرهنا فى اهالى بورسعيد وهما عارفين انها مؤامرة رخيصة عشان نقول رجعولنا قانون الطوارئ والنبى بنفس مبدأ اطلاق المجرمين فى الشوارع اثناء الثورة عشان نقول خلولنا مبارك والنبى

قبل مانقول يا ولاد كذا ولا ولاد كذا نشوف مين المستفيد ان فرقة كسبانة وبرده تنزل تضرب جماهير الفرقة التانية ومحدش يقولى مشاحنات
عشان لو هى مشاحنات بس مكنش هايبئا فيه التراس اهلاوى ولا التراس زمالكاوى فى مصر
وابئا سلملى على الجزائر (لو كنتوا نسيتوا يعنى )
  
6/2/2012
محمد ابو حامد فاسق
مصطفى بكرى طلع وطنى
عمرو حمزاوى بيتفرج
والستات ملهومش لزمة
ومصطفى النجار بيحضر اللى بيقوله على التويتر اولا
وعمرو الشوبكى مش موجود
وعصام سلطان فين ؟؟
والاخوان بيشوشروا على كلمة ثوار
والبرادعى عميل من زمان وثبتت انهاردة بقول بكرى
والخرطوش فوتوشوب
والداخلية ماضربتش
وانا وانت وسمعنى سلام برلمان الثورة بئا

  
15/3/2012
كل يوم بشوف خناقة جديدة على الفيس بوك وعلى تويتر وعلى كل صفحة فيها مناقشة..الخناقة بتبدا لما واحد ينزل خبر او فيديو او كلمة عن مرشح للرئاسة ويدخل الباقى اللى مش مقتنع واللى مقتنع بيه بس عنده اخرين افضل مع الناس المؤيدين خناقة ضد ومع وتشويه ولا تشويه...زى ما كان بيحصل اصل حسنى اللى مربينا وحسنى اللى مدلعنا البرادعى عميل الامريكان الاخوان هايبوظوا البلد احسن ان حسنى حابسهم..بس دلوقتى النغمة اختلفت بئا الراجل ده اصلا فلول وعايز يعمل وطنى الراجل ده من 6 ابريل العمرء اللى عايزين يخربوا البلد لالالا الراجل ده من الاخوان راجل بتاع ربنا يعنى او سلفى بما لا يخالف شرع الله
رفقا يا جماعة شوية كل الخناقات دى انما هاتعود بالسلب علينا كل واحد هايرشح حد او من مؤيدى طرف يعطى فرصة للباقى انهم يشوفوا مزايا كل المرشحين بلاش خناقة عشان ده بدقن ولا ده بشنب ولا دع ليبرالى ولا ده كان محبوس
للاسف كلنا كنا محبوسين 30 سنة فى سجن انفرادى محدش كان عارف يقول رايه مش معنى اننا خرجنا من السجن يعنى نخبط فى بعض ونشوه سمعة الناس
اذا اردت ان يحترمك الناس وان يحترموا رايك وقرارك عليك اولا باحترام قرار ورأى الغير

22/3/2012
المفروض ان الثورة يقوم بها جيل وطليعة جيل تقود الشعب بأكمله لسحق الاوضاع والنظم وانواع الحكم التى تغل الشعب وتحبس قدرته على التفتح والانتاج...هذا الجيل مهمته لا تنتهى بنجاح الثورة ..ولا تتم الا باقامة اوضاع جديدة اكثر ثورية ورحابة وتطورا ..لهذا فالجيل الذى يمهد للثورة هو وحده القادر على تنفيذها واذا نفذها فهو وحده القادر على خلق نظمها وبنائها الثورى الجديد.
العقل لا يتصور حينئذ أن يقوم جيل ما بالثورة وينتهى دوره ليتسلمها جيل اخر لم يعمل لها ولا آمن بها ولا خطر بباله احتمال قيامها..
يوسف ادريس متحدثا عن ثورة 1952

25/3/2012
احمد شفيق نازل ببنى بالبدلة وبابيض ببلوفر..
حازم ابو اسماعيل نازل بأزرق عليه علم مصر ..
ابو الفتوح نازل ببرتقالى فى اسود ..
حمدين الصباحى نازل باخضر..
الدورى ده مختلف يا جدعان ...محدش اختار الاحمر يعنى..شكلهم مش عايزين الناس تحسم الدورى بدرى بدرى
ورونا اللعب

26/3/2012
اتعودنا ان فى كل فيلم عربى اغنية يغانيها البطل او اغنية بتتغنى للبطل والبطل...مع ذاعة الفليم الرائع اللى بيحصل بئاله 3ايام وهو عسكر اخوانى ..
احب افترح على الاخوان اغنية يقولها للعسكر
والحلة على الباجور عشى عيالك انا رايحة بيت ابويا مش رجعالك

26/3/2012
الان وبعد طول انتظار حاليا بالاسواق ...
الاستاذ اشرف بارومة (ومحدش يضحك)قائدا لمصر ..
الاستاذ اشرف بارومه للقيادة مفاهيم عشناها...
والله بوستر شوفته فى الشوارع عند الاسعاف والاذاعة والتليفزيون مصدقتش فى الاول واحد متصور زى الصور اللى بنشوفها على ضهر كراسى الميكروباصات بس اشيك شوية..وكاتب اشرف بارومه قائدا لمصر...والله اول حاجة جت فى دماغى اترحمت على القذافى قائد الثورة الليبية اللى يفحره مطرح ماراح ...وكاتب شعار ليه للقيادة مفاهيم عشناها هى ماتجيش الا بمعنى عشان القيادة وهاتشوفوا ايام سودة
ولا معناها ايه بالظبط؟؟
والله العظيم ده احنا هانضوحك ضوحك الايام الجاية دى




27/3/2012
لكل من تفتقد او يفتقد روح الرومانسية فى حياة فما عليه غير انه يعد ويتفرج على الحملات الرئاسية لمنتحبى رؤساء جمهورية مصر العربية...
قمة الاثارة لما تشوف انصار وحبى ابو اسماعيل يدافعون عنه ولا يتقبلون حتى الهزار ...
قمة الدراما لما تشوف انصار ابو الفتوح وهما يقرون ان العمل فى صمت هو الاسما والاوفى
قمة التمتع لما تشوف حمدين الصباحى وهو مبتسم فى بوستره وكأن الحياة كلها امل شوية شوية هايطلع يغنى الحياة بئا لونها بمبى

انصار احمد شفيق بئا دول بئا الاخلاص والفل بجد اصله راجل مظلوم ومبارك ظلمه اعتبره اخوك يا اخى

ابو اسماعيل الفترة الجاية مش هاينافس الناس دى على الرئاسة ده هاينافس كاظم الساهر على الدابديب ولا ممكن يقولك الدباديب حرام ماهو جوزة الطيب حرام يبا الدبدوب مش حرام
بس ممكن يقبل الوردة الحمراء بما لا يخالف شرع الله


28/3/2012
ولــــــــــــــــعــــــــــت...
الاستاذ محمد السيد الشاذلى مرشحكم للرئاسة...
اول من نزل ثورة 25 يناير يناير...(تقريبا بس ضل الطريق)
اول من سيسلم ارض مصر الواسعة الى ابنائها...(على اساس انه هايخلص الارض من المعتدين)
اول من سيقضى على البطالة والعنوسة والبلطجة والمخدرات...(طيب البطالة والبلطجة والمخدرات وعرفنا انما العنوسة بئا ازاى هايجيب عرسان من الصين يعنى ولا هايجوز كل راجل ستة)

كان ناقص البوستر يقول فيه للحصور على المنتج الرجاء الاتصال على الارقام التالية 099990000 ومن اى محمول على 16000
انا هانتخب الراجل ده على فكرة زى الفل


ذكريات من زمن كان "احزان سنة"


هذه الكلمات كتبتها اعتبارا من تواريخها 
ومازلت مقتنعة بيها برغم مرور الزمن وضياع الاحلام  

19/11/2011
عارف يعنى ايه تشوف بنت بتتضرب وهدومها اتفتحت و اتبهدلت على الارض من شرطة ولا جيش ويكون رد فعلك هو ايه اللى خلاها تنزل ولا تقول ماهى لو محترمة كانت اتكنت فى بيتها ...للاسف اسمحلى اقولك ان كلمة راجل ماتستحقهاش والشعر اللى فى دقنك احلقه احسن
عفوا انه زمن الثورة المصرية اللى فيها البنت بميت راجل احسن من نوعية حضرتك


15/1/2012
البرادعى عامل زى واحد بيمثل فى مسرحية
الفصل الاول منها ابهر معظم الحضور واقنعهم بالاداء
الفصل التانى منها اتأثر بالضغوط اللى عليه من المخرج المتمثل فى المجلس العسكرى
والنقاد المتمثلين فى صناع الحملة اللذيذة اللى عليه
ومن كتر التأثر انسحب ولم يعبأ بالمنبهرين به
السؤال بئا اللى المفروض يتسأل هو البرادعى هايفضل فى الكواليس ولا هايترك المسرح كله ؟؟؟

17/1/2012
الاسم :قناة دينية
البرنامج : لدكتور مشهور تم التريقة عليه
الغرض : تقريب وجهات النظر
المستضاف : الشخص اللى اتريق على الدكتور الشيخ
الظهور : فى حلقة امس
النتيجة : الاعتذار له عن الظهور لاسباب غامضة
بيان القناة : انصاف حقائق ومغالطات لا بأس بها

فعلا قنوات يحتذى بها
المهم انى لو مش متابعة الراجل ده كويس كنت صدقت القناة
وبيانها الركيك :(((


19/1/2012
هو خلاص مفيش ولا رجولة ولا نخوة فى البلد دى
طيب بنات التحرير اللى اتسحلت قالوا لابسين وقالعين وهما شكلهم مش ولابد

طيب نوارة نجم كمان قالعة وشكلها يدل على الفجر وقلة القيمة
عشان يطلع عليها البلطجية اللى مش معروفين ويضربوها هى طيب يعنى ايه بئا

ضرب واحدة ست ده يبئا ايه بئا..الحاجة الوحيدة اللى تبسط فى الخبر ان نوارة الست ماجريتش وعرفت تدافع عن نفسها
الف سلام ليكى يا ست بمليون راجل


23/1/2012
أولى جلسات مجلس الشعب فكرنى لما كنا فى المدرسة الثانوية واول يوم المشرفة حذرت البنات من الجيبات الضيقة والبناطيل وقالتلهم الالتزام بالنص يا بنات

كل يوم تقف على الباب وتصوت فى بنت عشان الجيبة او عشان البنطلون

ولا البنات التزموا ولا هى بطلت صوات :))))


وربنا الراجل ده صعبان عليا هايجيله ازمة قبل ما يكمل الجلسة :((

الثلاثاء، 26 مايو 2015

اقوال..اقاويل..مقولات

* لتبدأ الحياة كل يوم من جديد كما لو انها بدأت للتو ...."جوته"

* لقد لقنتها الحياة درسا لا ينسى وهكذا حينما يغلق باب مافى قلبها فانها تسارع الى فتح باب اخر ....."ميرتل ريد"

* لو اردت ان تضحك الاقدار ،،فاحكى لها خططك المستقبلية ....."وودى آلان"

* افهمك رغم الصمت ،،، بل افهمك عبر الصمت،،، كأننا اكتشفنا لغة تخصنا وحدنا  ....."غادة السمان"

*لاشئ يرسخ الاشياء فى الذاكرة ويثبتها كالرغبة فى نسيانها ...."ميشيل دى مونتين"

* انك لاتعى حقا معنى الموت .. الا حينما تعرف الحب ...."كاترين هثواى"

*لا يموت الناس بالنسبة الينا وقت موتهم ,,بل يستحمون فى هالة من الحياة لاصلة لها بالخلود ,,بل باستمراريتهم فينا كما أيام كانوا أحياء وكما لو أنهم مسافرون ....."مارسيل بروست"

*شربت الخمر لأنسى ولكى لا أرى رسمك ..ولكن هيهات عندما سكرت صرت اراك مرتين ...."مارسيل آشار"

*تقبلونى كما اننا ولا كما تريدون لى ان أكون ...."أحمد العايدى"

*لقد قررت وهذا يكفى أن أحارب من أجل ما أريده وأن أكون مالايريده الآخرون لى ...."أوبرا وينفرى"

*مآسى الآخرين دائما سخيفة الى درجة متناهية ....."أوسكار وايلد"

*هناك ثلاث طرق للخراب :الميسر والنساء والمهندسون ,,, الطريقان الاوليان هما الاكثر لذة ولكن الطريق الاخيرة هى الاضمن ...."روتشيلد"

*النسيان هو الكالسيوم الوحيد الذى يقاوم هشاشة العاشق امام الفراق ...."أحلام مستغانمى"

*العالم مستشفى كبير للامراض العقلية ,,أسوأ مافيه أن رواده عكس رواد المصحات العقلية يسيرون طلقاء ...."ابراهيم الكونى"

*ينبغى ان يكون هذا جميلا ,,فنحن لا نفهم منه شيئا ...."مولييير"

*هذه ضحكة شمس تعتبر النهار عابر سبيل فى مدارها ..."حسن الحلبى"

*الحب هو المصيدة التى ينصبها الرجل بنفسه ثم يدخلها بكامل حريته ..."أنيس منصور"

*أحب الإطراء والمجاملات ،، وخصوصا عندما تغدق على عن كثب ...."صوفى ارنو"

*يجب على المرأة ان تثير حولها جوا من الغموض بحيث تجعل الرجل متشوقا الى اكتشاف سر هذا الغموض ولن يكتشف ذلك طول عمره ...."توماس اليوت"

*كلما جاءنى الامس قلت له ....ليس موعدنا اليوم فلتبتعد وتعال غدا ...."محمود درويش"

*لا تتحسن الحال حتى اذا حدثت الامور للبشر على النحو الذى يشتهونه ...."هيراقليطس"

*العقل لايحكم القلب ابدا لكنه يصير شريكا له فى جرائمه ...."مينون ماكلوجلين"

*اذا كان المستحيل يجب ان لا يرتاد فلماذا ايقظت فى قلبى الرغبة التواقه اليه ؟ ...."جلجامش"

*تستطيع الشمس ان تجفف مياه المحيط ,, ولكنها لاتستطيع ان تجفف دموع المرأة ...."سقراط"

*النساء خلقن ليتزوجن ..والرجال خلقوا لكى يبقوا عازبين ..من هنا كان كل السوء ...."ساشا غيترى"

*المرء  لايقع فى الحب ولايخرج منه ..المرء ينمو فى الحب ...."انتصار العقيل"

*الزوجة لاترى البتة مانفعل من اجلها,,انها لاترى الا مالانفعله من اجلها ...."جورج كورتلين"

*ماكنت اعتقد ان قلبى يرقص على اطراف اناملها ..."بيرون"

الجمعة، 3 أبريل 2015

ذكريات البعبع

كانت امى زمان علشان تمنعنا من الخروج بالليل برة..
كانت تحكى حكاية البعبع وحكاتهالنا يجى 100مرة ..
البعبع ياولاد حيوان..
عنده فى جسمه كله اسنان..
اللى يشوفه يموت من شكله..
واللى هايخرج بالليل ياكله..
وعلى الخوف من البعبع اتربيت..
وبقيت امشى ألزق فى الحيط..
يرعبنى صوت العربيات..
يرعبنى الصوت العالى فى الخناقات..
ترعبنى الريحة الجامدة لماتدخل مناخيرى..
يرعبنى اى تصرف يتصرفه غيرى..
واما كبرت خرجت أدور عالبعبع..
ملاقيتش حيوان اسمه البعبع..
ولا كمان بيعض الناس..
لكن لاقيته فى كل الناس..
اللى رئيسه واللى مراته..
والمرعوب من الحوجة اللى بتنهش فى حياته..
واللى يخاف لاالفرصة تفوت..
واللى يخاف من شبح العيشة..
واللى يخاف من شبح الموت..
كل الناس خايفة من بعبع كل الناس..
البعبع مش انياب ومخالب تطلع فى الضلمة..
البعبع مجرد احساس..

السبت، 28 مارس 2015

امى..

كنت اعرف قيمتها من قبل..
كنت اعرف انها غالية وذو مقام عال ...
ولكن عند بعدى عنها لفترة قليلة وجدت انها ليست غالية فقط ..
انها اغلى مافى حياتى انها الحياة التى اعيشها..الهواء الذى اتنفسه ..
امى ..فقط اريد ان تسامحينى عن اى تقصير فى حقك..
عن اى احساس بلامبالاة احسست به تجاهك فى اى فترة كانت..
اريد ان تعرفى انك سندى وظهرى القوة التى استمد منها قوتى ..
اعرفى فقط ان دمعة من عيونك تستطيع ان تحرق قلبى فلا اقوى على الوقوف مرة اخرى..
لقد تعبتى اعرف..وكلمة شكر واحدة لاتكفى ولا توفى حقك..لو باستطاعتى كنت دمرت كل احزانك ..وكنت فتكت بجميع اوجاعك وكنت اخذت كل شئ لاتقدرين على تحمله لى وحدى حتى لا تتألمين ..

امى الصديقة الحنونة التى تغضبنى فى اوقات ولكن كلامها صحيح فى النهاية
امى الاخت الكبيرة التى اذا ضاق بى الحال تدخلنى فى خبايها وتسعدنى ضحكاتها
امى الام التى تسهر على راحتى وتدارى اخطائى وتصحح لى دون رد ولا حساب

ربى اجعلها ملكة من ملكات الجنة
ربى احفظها لى واعطها وفرة من الصحة واشفها شفاء لا يغادر سقما