تفكير بصوت عالى

انا من معارضى شفيق ولم اكن يوم اتوقع ان كتلة كبيرة من الشعب انتخبته سواء عن ارادة او عن تزوير..
ولكن ايضا لم تدخل الى فكرة ان يكون الاخوان هم المحور الاساسى فى البلد هم مجلس الشعب والشورى والرئيس وايضا من يكتب الدستور كتير عليا ده ..
اعذار البعض ان شفيق من الفلول ومن مؤيدى مبارك ومن اصحاب موقعة الجمل وترك الشباب تموت ولكن هل يمكن احد يتخيل ان الاخوان برده عملوا نفس الكلام تركوا الشباب تموت فى محمد محمود وفى مجلس الوزراء وايضا فى العباسية بل واطلقوا عليهم فاسقين ومنحلين وبلطجية..
انا بقول ان شفيق يكون صادق شوية عن الاخوان على الاقل انه مطلعش ينصر الثورة ولا مرة..انما الاخوان على حسب اهوائهم اذا كانت مصلحتهم مع الثورة والثوار كانت الثورة هى المبدأ الاول والاخير هى الحياة والمنتهاه  واذا كان الاتفاق مع المجلس العسكرى ادى الى مصلحتهم كانت الثورة عبارة عن اسلوب لحياة البلطجة..
شفيق فاسق ولكنه الان يحمل الدولة المدنية بين يديه مع الاسف..هل هى دولة مدنية بنظام مبارك او بغيره لسة مش عارفين بس اللى هايكون فيه ظبط فى الموازين عشان البرلمان اخوان وكمان الحكومة لازم تتشكل من الحزب الغالب..
زهئت من التفكير مش هانتخب الاخوان وقلبى هايطبق عليا من فكرة انتخاب شفيق ..الشقيف فريق يالهووووووووووووووى ولكنه الاختيار بعيد عن الاخوان :(

احبــــــــــــــــــاط

سيدى الفاضل عبد المنعم ابو الفتوح..منك لله
الشريف العادل حمدين صباحى اللى هو واحد مننا ....منك لله انت كمان

اولا منك لله يا استاذ عبد المنعم ابو الفتوح لانك قللت من شأن صباحى لدرجة ان مؤييدوك بدأوا يصدقوا قصة انك الاكثر شعبية(وانت من تمثل الثورة منفردا) ولا يجوز التفاوض على الرئيس والنائب..

ثانيا الاستاذ الجليل حمدين صباحى الذى ابهرنى وفاجأنى مفاجأة الزمالك لما يكسب ماتش صعب والكل متوقع فضيحة منه لم تسعى ابدا لتوحيد الصف مع ايا من باقى المرشحين حتى يكون للثورة عنوان جديد ولم تحاول مع ابو الفتوح مرة اخرى

انتخابات ولا استهبالات

الاول قلنا لا للتعديل الدستورى قالوا انتوا عايزين توقفوا عجلة الانتاج المفسية اصلا ..ولما طلع نتيجة الاستفتاء ب 77% نعم قلنا تمام هانحترم الديموقراطية وهانحترم اللى قالوا نعم ...بس دلوقتى طلعوا قالوا ان الرئيس القادم بلا صلاحيات..طيب يعنى دلوقتى هايجلينا خيال مآتة ولا ايه ..لا دول هايعملوا مكمل لاعلان الدستورى ..

مش فاهمة طيب ماهو من الاول كانوا قالوا لا ونطلع دستور جديد وخلاص ونخلص والناس تنزل تستفى فيه...هى مش الثورة اسقطت نظام يعنى اسقطت دستور ..

انا اتشليت من الناس اللى بتبص بس تحت رجلها ...مجلس عسكرى مهزوز.. ومجلس شعب فاقد للشرعية اساسا ..ومجلس شورى ملهوش ولا تلاتين لزمة انما انكتب علينا وخلاص

بجد مابئاش اسمها انتخابات اسمها استهبالات او مهازل انتخابية :)

مزادات ومزايدات

المزايدة على الاخرين 


*لااحب مايفعله بعض الناس فى المزايدة على الاخرين حتى لو مجرد ان تفكيرهم مختلف..فالمزايدة مش بس فى الوطنية وحب البلد انما كمان بئت فى الدين والجديد انها اصبحت مزايدة على الاخلاق..
فالاخلاق اصبح من يزايد عليها اما عديم الاخلاق اساسا او فاهم انها صفة تكتسب ..الاخلاق هي فعل يكتسبه المرء بالتعامل مع الاخرين ونحن كمجتمع اسلامى اولا عربى ثانيا اخلاقنا اكتسبناها من افعال الرسول (صلى الله عليه وسلم).ولازم الكل يفهم ده محدش اعلى من حد اخلاقا انما فيه واحد بيعرف يتصرف غى مواقف وحد تانى لاء ودى قدرة على التصرف والتفكير مش اخلاق :(


*انما بئا مزاد الوطنية العلنى اللى بيتكلم فيه كل يوم المرشحين فاعتقد ان كل واحد فيهم فاهم الوطنية من منظور قديم ضيق لا يعتريه احد واحد معارض فيبئا الوطنية من وجهة نظره هى المعارضة وانه طول الوقت بيعارض..واللى من الفلول يعتبر وطنيته انه حارب وانه عمل انجازات الحرب او انجازات فى منصب هو اشتغله فى فترة المخلوع..كأن محدش عمل اللى عمله يعنى..


*اما بئا مزايدة على الرأى والواضح انها انتشرت كتير..فاى حد يبئا مثقف يبئا بيتكلم كأنه هو اللى شايف ويغيره مش شايف..هو اللى عارف وغيره مش عارف..ومش ناوى يعرف حد واللى يعرضه يدبحه ومنتظر من معارضيه انهم يبئوا بمنتهى الادب معاها عشان هو بينادى بالديموقراطية..بس ديموقراطية للاسف من طرف واحد